- قصيدة / ( كلمتين )
- بقلم/ ( شرين سعد أحمد )
- شاعرة جنوب الوادي
- #شرين_سعد_أحمد
- *********************
- أنا قلت أمسك القلم
- واكتبلي حالاً كلمتين
- قام القلم ساق ف العوج
- ورفض يخط وقال لمين
- راح تكتبي ليه تتعبي
- دا الكل غفلان من سنين
- قلتله ليه كسر الخواطر
- والهمة يا ابو الصوت حزين ؟
- قلي ياست الكل بصي
- ع اللي حصل للمبدعين
- شوفي كام قلم غيري انظلم
- وبكى وشكا للموجوعين
- شوفي كام كتاب ع الرف داب
- غطاه تراب الغفلانين
- شوفي كام جدع صابه الفزع
- أما نساه المهملين
- راحوا صقفوا للي رقص
- قالوا عليه م الموهوبين
- شالوا اللي هرتل بالكلام
- فوق الكتاف كانوا مبسوطين
- ع الشاشة هم اتلمعوا
- وف لحظة صبحوا مريشين
- سكنوا القصور حواليها سور
- وادي الجنينة بالبسين
- في المهرجان طلع الجنان
- واتخشبوا دول مجذوبين
- يوتيوب يذيع بقى شيء فظيع
- إعلام يقول دول فنانين
- مونتاج كمان شكله جنان
- ماهو( بيس يا مان) والوقعة طين
- حلق وحوش على دا الخبر
- نَزَّل سي دي مستنين
- احجز مكانك في الصدارة
- و يا مية خسارة ع الطيبين
- واللي كلامهم يشفي حرج
- ويطيب بحرفه المجروحين
- سكت القلم بعد الألم
- قلبه رشق جواه أنين
- رديت أنا وقلت ياااااه
- محقوقة ليك والحق زين
- غلطانة أنا هكست أنا
- لو ميت سنة فوقهم يومين
- بس أنت لازم تتحبس
- أو تتخرس تصبح سجين
- ساعتها تبقى أنت البطل
- مظلوم ضحية مدعين
- الفن مش إسفاف وعك
- الفن لحنه صوت رزين
- يملا النفوس إحساس يدوس
- صوت الخراب والمجرمين
- أما أنا راح انسحب
- راح اختفي وإن سألوا فين
- راح أقول في بيتي هعتكف
- مش هعترف وهقول لحين
- يوم تعرفوا معنى الحروف
- هرجع في يومها واقول آمين
- ***********
- شرين سعد أحمد
- شاعرة جنوب الوادي
الجمعة، 22 فبراير 2019
قصيدة / ( كلمتين ) بقلم/ ( شرين سعد أحمد ) شاعرة جنوب الوادي
الاشتراك في:
تعليقات الرسالة (Atom)
ليست هناك تعليقات:
إرسال تعليق